Заев: Растат платите! Богојески: А трошоците?

Премиерот Заев објави дека за четири години, од април 2017 до април 2021 година, просечната плата е зголемена за 5.766 денари, а за шест години, пак, од април 2011 до април 2017, платите пораснале само за 2.153 денари.

Богојески постави едно прашање до премиерот Заев: А колку пораснаа трошоците во истиот тој период, премиере?

Достоинството на работниците е скапоцено и затоа ја покачивме минималната плата на 15.284 денари, која до пред четири години беше 9.000 денари. Растот на минималната плата направи притисок за покачување на сите плати. Во изминатите четири години платите бележат постојан раст во сите сектори, напиша Заев.

Премиерот Заев наведе дека во април 2021 просечната плата изнесуваше 28.438 денари, што е раст од 10,1 отсто во однос на истиот месец 2020 година.

– И нема да застанеме тука. Нашата цел е да го оствариме даденото ветување пред граѓаните, за минимална плата од 18.000 и просечна плата од 36.000 денари до крајот на овој мандат. Тоа и ќе го оствариме!, напиша премиерот Заев на Фејсбук.

Меѓутоа Заев не одговори, колку се пораснати трошоците за живот. Богојески смета дека на времето 5.000 денари вредеа многу повеќе од денес 15.000 денари. Според него, огромната инфлација во земјава се сокрива од јавноста.

Растат трошоците на живот, опаѓа вредноста на денарот, со 5.000 денари пред 10 години се полнеше семејната кошница, а денес со 15.000 денари таа останува полупразна. Како може премиерот да објавува пораст на плати, без да компарира со порастот на трошоци. Срамна манипулација со нашите граѓани! изјавува Богојески.

Кој е во право во неговото тврдење, Богојески или Заев?