Заев: „Северна“ влегува во ФФМ?

Грчката влада жестоко реагира за настапот на македонската фудбалска репрезентација под кратенката МКД за Македонија или под амблемот на ФФМ.

На грчките реакции одговор дадоа министерот Османи и ФФМ, со аргументот дека фудбалот не е работа на Преспански договор и нема никаква обврска за ФФМ да си го промени името. Меѓутоа така не мисли и премиерот Заев, кој инсистира „северна да ја ставиме и на личните имиња“. Човекот едноставно го изгуби патот за имплементација на Преспанскиот договор.

Изјавата на премиерот Заев е по реакциите во Грција за амблемот на ФФМ на дресовите на нашите репрезентативци.

– Цела Европа знае дека нашата фудбалска репрезентација на првенството ја претставува Северна Македонија. Дури и Федерацијата да не е јавен ентитет, националниот тим е. Како што е во сите земји во светот. Па така, јасно е и треба да биде јасно на сите нивоа дека е репрезентација на Северна Македонија, ирелевантно од иницијалите на Федерацијата на дресовите. Веќе го покренавме конкретниот аспект со Федерацијата и во наредниот период ќе го решиме прашањето врз основа на Договорот од Преспа и правилата и традицијата на УЕФА, вели премиерот Заев.

Претседателот на Владата во изјавата додава дека „имплементацијата на Договорот од Преспа е работа во тек и нашата цел е постепено да најдеме решенија со соседите кои го спроведуваат Договорот и да нè придвижат напред врз основа на соработката и взаемното почитување“.