Пропаѓа ли еден од најголемите синџири маркети во Македонија?

Вработени во синџирот маркети „Тинекс“ најавуваат протест, тврдејќи дека со месеци не примиле плати, во услови на сè погласни шпекулации за сериозни финансиски тешкотии во компанијата.

Според неофицијални информации, фирмата се соочува со значајни долгови и нарушена ликвидност, вклучително и обврски кон добавувачи. Дел од извори наведуваат дека актуелната состојба е резултат и на послабо управување во претходниот период. Во некои маркети, како што тврдат купувачи, веќе се забележуваат празни полици и ограничена понуда на производи.

„Тинекс“ со години беше еден од водечките малопродажни синџири во земјата, со широка мрежа на објекти и препознатлива понуда на производи и услуги.

На социјалните мрежи се појавуваат бројни реакции од граѓани кои укажуваат на влошена состојба во дел од продавниците. Дел од коментарите опишуваат празни полици и намалена посетеност, со забелешки дека проблемите траат подолг период.

Од компанијата засега нема официјална реакција ниту потврда за информациите поврзани со финансиската состојба. Нејасноста околу работењето на еден од поголемите ланци маркети отвора прашања за стабилноста на бизнисот и состојбата на вработените.