ОТКРИЕН е функционерот на МНР кој се заканувал на историската комисија

Првиот човек на Директоратот за билатерални односи со европски држави, Методија Белевски бил високиот функционер од МНР кој вршел политички притисоци врз одлуките на мешовитата комисија за историја.

Како што се дознава Белевски инструкциите ги добивал од повисоките инстанци во МНР, а неговата задача била да влијае на она што членовите на Комисијата треба да го донесат како дел од заедничката историја со Бугарија. Истите извори велат дека Белевски бил дел и од делегацијата на последната посета на македонските власти во Софија и е една од врските со тамошните институции, што се потврдува и од официјалните видеа објавени на каналот на Влада пред три месеци.

Од министерството не ја демантираат информација дека Белевски е дипломатот кој е директно поврзан со скандалот кој го објави професорот Ѓорѓиев и кој беше посочен дека вршел политичко влијание при носењето на одлуките во Комисијата.

Министерството на ниту еден начин досега не бил дел од научната работа на Комисијата, уште помалку во создавањето содржина во рамките на работата на Комисијата. Загрижува фактот што очигледно работата на Комисијата стана предмет за дневно полички натпревар во изборен контекст, што ги загрозува кревките суштинските придобивки од нивната работа, стои во дел од одговорот од МНР.

А откако професорот Ванчо Ѓорѓиев си даде оставка од заедничката македонско-бугарска комисија за историски и образовни прашања, телефонски добил закана од висок функционер во МНР, објави порталот пресинг. Според сведочењето на професорот откако им соопштил на своите колеги дека ја напушта комисијата, се слушнал телефонски со дипломатот, кој се обидувал да го разубеди професорот да го преиспита својот став и да продолжи со работата поради чувствителноста на политичкиот момент.

Но, со оглед дека Ѓорѓиев останал на своето, подоцна повторно му заѕвонил функционерот и му се заканил директно со зборовите „Да знаеш, за ова лично ќе ти се одмаздам“.

Инаку професорот Ѓорѓиев, додал дека смета оти „високиот функционер“ не настапува лично, туку дека е пренесувач на инструкции и пораки од повисоки инстанци.