Николоски: Скопје ќе добие подобри железнички врски со соседните држави

Железничката поврзаност на Скопје со главните градови во соседството би можела значително да се подобри во следните години, преку повеќе проекти што се поврзани со Коридорите VIII и X.

Поголем дел од инфраструктурните зафати веќе се во различни фази на реализација, додека повторното воспоставување на железничката линија меѓу Скопје и Приштина е најавено за 2027 година.

На источниот правец, Македонија треба да добие целосна железничка врска со Бугарија. Во мај 2027 година е планиран почеток на изградбата на последната делница од македонска страна, од Крива Паланка до границата со Бугарија, во должина од околу 23 километри.

Делницата Куманово–Бељаковце, долга околу 31 километар, веќе е завршена, додека се работи на делот Бељаковце–Крива Паланка. Според актуелните планови, оваа делница треба да биде завршена во 2028 година.

За изградбата на источниот железнички коридор е обезбеден финансиски пакет од околу 560 милиони евра, составен од заеми од Европската инвестициска банка и Европската банка за обнова и развој, како и европски грантови.

Кон Србија, фокусот е на модернизацијата на Коридорот X. Почетокот на работите на трасата Табановце–Гевгелија е најавен за април 2027 година. Проектот опфаќа модернизација и електрификација на пругата, а на одредени делови е предвидена и изградба на втор колосек.

Со реконструкцијата се планира железничкиот сообраќај да биде значително побрз, при што патничките возови би можеле да достигнуваат брзина до 160 километри на час.

Овој правец е дел од железничката оска Белград–Скопје–Солун, па модернизацијата на македонската делница треба да придонесе за подобра поврзаност на трите градови и на земјите долж Коридорот X.

Посебно внимание е посветено и на железничката врска со Косово. Министерот за транспорт Александар Николоски најави дека возовите меѓу Скопје и Приштина би можеле повторно да сообраќаат во 2027 година.

На косовска страна во тек се активности за модернизација на железничката инфраструктура, а според најавите потребно е да се заврши и уште еден тунел. Откако ќе завршат тие работи, на македонска страна би биле потребни дополнителни четири до шест месеци за подготовка на пругата.

Николоски најави дека, доколку динамиката биде исполнета, патувањето од центарот на Скопје до центарот на Приштина би траело околу 50 минути.

Тој посочи дека дневно повеќе од 10.000 возила ја минуваат границата меѓу Македонија и Косово, што, според него, укажува на значителен потенцијал за воспоставување редовен железнички превоз.

Со реализацијата на најавените проекти, Скопје би можело да стане значајна железничка точка во регионот – со директни или подобрени врски кон Софија, Белград и Приштина, а преку Коридорот X и кон Солун.

Сепак, роковите зависат од динамиката на изградбата и модернизацијата на железничката инфраструктура, како во Македонија, така и во соседните земји.