Тоневски: Првачињата со голем интерес се запознаа со работата на Општината Пробиштип

Градоначалникот на Општина Пробиштип, Тони Тоневски, денеска оствари средба со најмладите жители на општината, кои имаа можност одблиску да се запознаат со работата на локалната самоуправа и со обврските на градоначалникот.

На средбата, на едноставен и разбирлив начин, првачињата разговарале за тоа како функционира Општината, како се носат одлуките и на кој начин тие влијаат врз секојдневниот живот на граѓаните.

Посебно внимание, како што посочи Тоневски, привлекле љубопитноста и искреноста на најмладите, како и нивната желба да поставуваат прашања, да споделат идеи и да бидат слушнати.

„Нашите најмлади сограѓани заслужуваат да растат во безбедна, убава и развиена општина, а наша обврска е да создадеме услови токму за тоа“, порача Тоневски.

Тој на првачињата им посака успешен почеток на нивното училишно патување, исполнето со нови знаења, пријателства и убави моменти.