Новиот Мистер на Македонија го знаете сите: Ќе нè претставува во Тајланд, еве што ѝ порача на нацијата

Октај Сејди е новиот Мистер на Македонија за 2026 година, а познатиот македонски фризер, шминкер и стилист наскоро ќе застане на големата меѓународна сцена.

Сејди ќе ја претставува Македонија на престижниот избор „Mister International 2026“, кој ќе се одржи на 26 септември во Тајланд.

– Со гордост го претставуваме Октај Сејди, кој оваа година ќе ја претставува Македонија на „Мистер Интернационал 2026“. На 26 септември, во Тајланд, Октај ќе застане рамо до рамо со претставници од целиот свет, носејќи ги македонските бои на една од најпрестижните меѓународни сцени за машка убавина. Му посакуваме многу успех, самодоверба и незаборавно искуство на патот кон големото финале – пишува во официјалната објава.

За македонската јавност Октај не е непознато лице. Тој со години е активен во светот на убавината, модата и естрадата, а неговата професионална работа како фризер, шминкер и стилист го направи едно од препознатливите лица во оваа индустрија.

Неговата кариера започнува уште во тинејџерските години, а низ годините тој успева да изгради сопствен стил и препознатлив имиџ. Покрај професионалната работа во салонот, Октај е активен и како модел и инфлуенсер.

Новата титула за Сејди претставува уште еден голем чекор во неговата кариера.

– Ова беше тоа што долго го чекав и спремав. Ветувам дека ќе направам максимум за Македонија – пишува во неговата објава.

Октај Сејди во своите јавни настапи често зборува за самодовербата, негата, изгледот и важноста човек да се чувствува добро во сопствената кожа.

Тој смета дека македонските мажи имаат голем потенцијал кога станува збор за стилот и изгледот, но дека понекогаш постојат предрасуди кои ги спречуваат слободно да го изразат својот карактер.

Неговата порака до сите е да бидат свои, да имаат самодоверба и да не дозволуваат туѓите мислења да им бидат пречка.

За него, грижата за изгледот не значи површност, туку начин човек да покаже кој е и како се чувствува.

Токму со таков став Октај ќе патува во Тајланд, каде што ќе има можност да се претстави пред публика од целиот свет.

Од добро познато лице од македонската модна и естрадна сцена, до Мистер на Македонија за 2026 година, Сејди сега го очекува еден од најголемите предизвици во досегашната кариера.

На 26 септември сите очи ќе бидат вперени кон Тајланд, каде што Октај Сејди ќе се бори за што подобар пласман и ќе се обиде достоинствено да ги претстави македонските бои на меѓународната сцена.