Скопје ги очекува: ИЗБРАН ПОНУДУВАЧ ЗА НОВИТЕ ГРАДСКИ ЕЛЕКТРИЧНИ АВТОБУСИ

Проектот за обновување на јавниот превоз влегува во завршна фаза, откако беше избран најповолниот понудувач за набавка на 150 електрични автобуси наменети за градскиот превоз во Македонија.

Најголемиот дел од новите возила – 100 електрични автобуси – ќе бидат испорачани на ЈСП „Скопје“, додека останатите 50 ќе бидат распределени во други општини и градови во земјата.

За реализација на проектот е избрана понудата на унгарската компанија „Електробус Икарус“ и австриската компанија ЕВН, која беше оценета како најповолна во тендерската постапка.

Градоначалникот на Скопје, Орце Ѓорѓиевски, оцени дека станува збор за значајна инвестиција што ќе придонесе за модернизација на јавниот превоз и подобрување на услугите за граѓаните.

Во наредните десет дена ќе тече законскиот рок за евентуални жалби. Доколку постапката заврши без приговори, ќе следува потпишување на договорот и почеток на испораката на автобусите.

Според податоците од Министерството за транспорт, вредноста на избраната понуда изнесува околу 3,12 милијарди денари без ДДВ, односно приближно 50 милиони евра. Во проектот е вклучена и изградба на инфраструктура за полнење на електричните автобуси.

Испораката е предвидена да се реализира по фази. Во првата етапа ќе пристигнат првите автобуси и станици за полнење, по што ќе следуваат уште две испораки до целосно комплетирање на возниот парк.

Проектот претставува една од најголемите инвестиции во јавниот превоз во последните години и има за цел да обезбеди помодерни, еколошки и енергетски поефикасни возила, како и да придонесе за намалување на загадувањето и подобрување на квалитетот на воздухот во урбаните средини.