Спектакл во Крушево: Милош Вуковиќ го отвори „П.С. Гитар Фест“ со концерт за паметење (фото)

Во уникатниот амбиент на Спомен-куќата на Тоше Проески во Крушево, синоќа свечено беше означен почетокот на 17. издание на Меѓународниот фестивал на класична гитара „П.С. Гитар Фест Крушево“, настан кој со години претставува значајна музичка платформа за врвни уметници и млади таленти.

Честа да го отвори фестивалот му припадна на реномираниот српски гитарист Милош Вуковиќ, кој пред присутната публика приреди концерт исполнет со емоција, виртуозност и врвна музичка изведба. Со префинета техника и впечатлива музичка експресија, Вуковиќ успеа да создаде посебна атмосфера, освојувајќи ги симпатиите на љубителите на класичната гитара и заслужувајќи долги аплаузи по секоја изведба.

Фестивалот низ изминатите седумнаесет години се етаблира како едно од најзначајните музички случувања од ваков вид во регионот, место каде што се среќаваат искуството, талентот и љубовта кон гитарската уметност. Преку својата програма, тој успешно ги поврзува афирмираните музичари со новите генерации изведувачи, создавајќи простор за размена на знаење, инспирација и уметничко творештво.

Фестивалската програма продолжува и вечерва, на 20 јуни, кога пред крушевската публика ќе настапи романското дуо „Артисимо“. Препознатливи по својата сценска енергија, музикалност и оригинални интерпретации, членовите на ансамблот најавуваат уште една вечер исполнета со квалитетна музика и незаборавни моменти.

Завршниот ден од фестивалот е закажан за 21 јуни со почеток во 12 часот, кога на сцената ќе се претстават учесниците од школата за гитара предводена од м-р Васко Пиличев. Концертот ќе биде посветен на младите музички надежи, нивниот талент и љубов кон инструментот.

Посебен белег на финалната програма ќе дадат изведбите на гитарски аранжмани од најпознатите песни на Тоше Проески. Преку своите интерпретации, младите гитаристи ќе му оддадат почит на неговото богато музичко наследство, потсетувајќи на трајната вредност и влијание што Тоше го остави во македонската музичка историја.