Грчки професор по генетика со нова провокација: Македонците генетски најблиски до Бугарите

Истражување на грчкиот научник Константинос Триантафилидис повторно ја отвора дебатата за генетското потекло на населението во Северна Македонија и неговата поврзаност со другите балкански народи. Според резултатите од анализата, македонската популација покажува најголема генетска близост со бугарската, во споредба со останатите народи во регионот.

Податоците се дел од научниот труд „Генетичната историја на Грците“, во кој преку анализа на ДНК-маркери се следи историскиот развој и мешањето на популациите во Југоисточна Европа. Истражувањето укажува дека словенската популација во Северна Македонија се групира генетски најблиску до Бугарите, додека оддалеченоста е поголема во однос на Србите и Грците.

Авторот оваа појава ја поврза со заедничкото потекло од словенските племиња кои се населиле на Балканот во раниот среден век, како и со историските и политичките процеси што влијаеле врз регионот во наредните векови. Особено се нагласува улогата на средновековните државни структури и долготрaјните демографски врски меѓу населението од двете страни на денешната граница.

Во истражувањето се анализира и генетскиот профил на бугарската популација, при што се констатира дека доминираат линии типични за европските народи. Учество на генетски маркери поврзани со Централна Азија е ограничено, што доведува во прашање некои постари теории за потеклото на Бугарите.

Дополнително, студијата се осврнува и на тезата дека современите Македонци се директни потомци на античките Македонци од времето на Александар Македонски. Според добиените резултати, не е утврдена јасна генетска врска што би ја потврдила оваа теза. Наместо тоа, се забележува силна поврзаност со словенските популации, што укажува на значајната улога на средновековните миграции во формирањето на денешниот етнички состав.

Истражувањето истакнува дека Балканот претставува простор на интензивно мешање на народи низ вековите, што придонесува за генетските сличности меѓу современите популации. Во тој контекст, авторот заклучува дека генетските врски меѓу Македонците и Бугарите се резултат на заеднички историски и демографски развој.