Македонија под снег – започнаа пообилните врнежи, еве каде е најкритично утрово

Од ова утро 21 Јануари 2026 среда како што најавив во минатите мои метео објави од југозапад во Македонија се прошируваат пообилни врнежи кои се најмногу од снег и токму во Македонија започна формирање, зголемување и проширување на снежната покривка. Токму ова е поради влијанието на циклонската активност во Медитеранот и влажниот воздушен бран кој е поврзан со ладен воздух од север и од североисток на Европскиот Континент.

На метеоролошката карта можете да ги видите температурите ова утро измерени во Македонија до 4 часот. Може да се види дека насекаде имаме минусни температури и појава на мраз.

Првиот снег сезонава предизвика сериозни проблеми во сообраќајот во Скопје, а голем дел од улиците утрово се непроодни или тешко проодни, реагираат граѓаните преку социјалните мрежи.

Како најкритични точки се посочуваат мостот Маџари кон Ченто, како и надвозникот од населбата Даме Груев кон Ѓорче Петров, каде возилата со часови стојат во место. Според сведочењата, коловозите се замрзнати, а сообраќајот се одвива исклучително бавно или е целосно блокиран.

Проблеми се пријавуваат и во Општина Илинден, каде се создала огромна гужва, а излезот кон автопатот е речиси невозможен поради замрзнати коловози и застој на возилата. Слична состојба се бележи и во Драчево и Пинтија, каде има долги колони и исклучително лизгави сообраќајници.

Дополнителни проблеми има и во јавниот превоз. Граѓанин преку Твитер сподели:

„Снег – преубаво, ама сабајлево одам на 7-мица на Трета македонска и гледам 200 луѓе чекаат повеќе од еден час. Среќен сепак, одам пеш до Железничка, нешто ќе ме однесе до кај Симпо.“

Граѓаните апелираат до надлежните служби за побрза интервенција, чистење и посипување на улиците, особено на мостовите и надвозниците, истакнувајќи дека поради снежните услови доцнат на своите работни места.

Во меѓувреме, се препорачува возачите да бидат крајно внимателни, да користат задолжителна зимска опрема и, доколку е можно, да ги одложат патувањата додека не се стабилизира состојбата на патиштата.