СКАНДАЛ: ВЛАДАТА со буџетска поддршка на руски тајкуни

АНАЛИЗА

Македонската Влада од една страна протерува руски дипломати, а од друга дирекно соработува и поддржува руски криминални и разознавачки проекти во земјава.

Кон крајот на февруари годинава донесе заклучок за да се придружи кон пакетот санкции на ЕУ, вклучително и на сите досегашни од 2014 година, поврзани со кршењето на суверенитетот и територијалниот интегритет на Украина, прво преку анексијата на Крим, а сега и со таканаречената специјална воена операција на Русија, а не презема ниту една мерка за сузбивање на реалната руска мрежа на терен низ Македонија со руски соработници, особено не ја замолчи руската пропаганда која пред се доаѓа преку српскиот медија простор, омилен на премиерот Таче.

Со одлуките за „вето“ за Русија и нарачани „млаки“ реакции од руската Шеќеринска, како што велат од Владата, земјава постигнува 100 отсто придружување кон заедничката надворешна и безбедносна политика на ЕУ, реализирајќи ја, посочуваат од таму, максималната стапка на придружувања како јасен и конзистентен израз на нашата евро-атлантска надворешно-политичка ориентација и цели на државата.

Но, со оглед дека ЕУ неколкупати ја проширува листата на лица опфатени со санкциите поврзани со Русија и рускиот државен врв, се поставува прашањето дали со санкциите на кои им се придружи и земјава опфатени се лица-руски државјани кои делувале или моментално делуваат во Македонија во одредени бизнис-сектори?

„Овие санкции главно се насочени кон високи државни претставници на Руската Федерација, како и кон конкретни фирми од банкарскиот сектор кои немаат свои активности во земјава. Оттаму, на листата не се наоѓаат лица кои имаат бизнис во Северна Македонија“, велат од Владата.

Инаку, рускиот капитал во земјава е присутен преку повеќе компании, а една од најпознатите руски компании во земјава е нафтената „Лукоил“, која влезе во фокусот на јавноста откако македонските власти ги повикаа граѓаните да не купуваат нафтени деривати од оваа компанија, бидејќи така индиректно ја финансирале војната во Украина.

На сите ни е јасно дека купувањето на руска нафта и гас ја финансира војната, односно руската армија. Главните средства на Русија доаѓаат од изворите на природен гас и нафта. Како што гледате Европа е зависна од тој гас и од нафтата и доставата не е прекината целосно токму поради таа зависност – рече министерот за надворешни работи Бујар Османи.

Но што конкретно направи Владата против руските бизниси во земјава, освен паушални и декларативни изјави? Дали презема мерки против „новинарски“ и други политички активисти кои се дирекно конектирани со руските бизниси?

Во однос на тоа реагираше Аријанит Хоџа од опозициската Беса, кој објави документ од кој се гледа дека Министерството за надворешни работи купувало нафта од „Лукоил“, што, според Хоџа, би значело дека и МНР ја финансира војната на Украина, ако се суди според аршинот на Османи.

На чело рускиот нафтен гигант е Вагит Алекперов, чија компанија е една од најголемите компании за нафта и гас во светот и сочинува околу 2 отсто од глобалното производство. Покрај „Лукоил“, руско бизнис-присуство во државава има и преку Те-То и БЕГ, кое располага со лиценците за снабдување и дистрибуција на топлинска енергија, откако пред повеќе години ги презеде од Топлификација.

За информација, БЕГ АД е формирана од две фирми, секоја со влог од по 25.000 евра. Едната е „Кордикор“ со седиште на Кипар, а втората е „Битер Холдинг“ регистрирана на островот Џерси (дестинација помеѓу Англија и Франција). Станува збор за фирми на ТГК 2, во кои управувачки пакет има фирмата „Синтез“ на рускиот тајкун Леонид Лебедев, кој во матичната држава беше и обвинет за финансиски криминал.

Пред да влезе негов капитал во земјава, тој во Русија се сретна со поранешниот македонски премиер Никола Груевски, поради што многу го доведуваат во корелација со поранешната власт предводена од ВМРО-ДПМНЕ. Меѓу нив беше е Марјан Ненов од здружението Но Пасаран, кој смета дека тогашната власт го создала БЕГ.

– Груевски во јуни се гледа со Лебедев, а само по месеци и пол, БЕГ АД е формирана како компанија од компаниите на Лебедев. Груевски не можел се ова сам да го направи, така што сигурно имал помош од фамилијата. За да го тргнете поранешниот директор на Топлификација Хаџимишев, односно да му ги земете лиценците, треба добро да го стиснете – рече во интревју за Фокус.

Но токму владата на Таче и СДСМ оваа зима поклони милиони и милони народни пари на руските комшании, со цел да обезбеди топлинска енергија за граѓаните на Град Скопје, притоа дирекно заштитувајќи ги интересите на руските тајкуни во земјава, истите тие кои се на црн список на САД и ЕУ. Какви се тие 100% заеднички мерки и санкции со ЕУ и НАТО, кога екипата на Путин во Македонија добива пари дирекно од буџетот на државата?

Во секој случај, најпрепознатлив руски експонент во Македонија е Сергеј Самсоненко, кој за првпат пристигнал во земјава во 2006 година, на покана на бизнис-пријател, меѓутоа, според негови зборови, толку многу му се допаднало, поради што одлучил да го напушти родниот Ростов на Дон и да се пресели во Скопје.

Оттогаш, тој го изгради хотел „Русија“, влезе во сопственичката структура на неколку компании и почна да ги финансира спортските клубови што го носат брендот Вардар, од кои неодамна се повлече. Еден од неговите инвестициски проекти беше и деловно-хотелскиот комплекс, кој се гради на скопскиот плоштад, чија судбина практично стана неизвесна поради стечајната постапка предизвикана од негови поранешни соработници и партнери.

По повод овој случај, Фокус своевремено реализираше интервју со Самсоненко, во кое тој вели: „Јас не сум политички човек, јас сум почесен конзул на Русија и треба да ја поддржувам политиката на мојата матична држава. А, кога ќе почнам да поддржувам една или друга партија, ќе добијам забелешка од руската амбасада, бидејќи не смеам да поддржувам партија…“.

Но Самсоненко никако не соопшти како стои со бизнис мрежата во земјава и дали истата е веќе длабоко конектирана со Заев и новата Влада на Таче? Како тоа бизнис партнерот на Мијалков, толку лесно помина за времето на управување на Заев?

Дали ќе добиеме одговор на овие прашања? Зошто народни пари од Буџетот на Македонија се плаќани на руските компании во земјава?