„ПРОКЛЕТИ ДА СЕ ПЕРДАВНИЦИТЕ“ – Бујар Османи се сретна со Кирил Петков со кого го договорија „Францускиот предлог“

Бујар Османи и Кирил Петков, поранешниот министер за надворешни работи на Македонија и поранешниот премиер на Бугарија, кои во свое време го договорија „Францускиот предлог“, се сретнаа на Самитот за безбедност во Атина.

„Денес во Атина се сретнав со Кирил Петков, поранешниот премиер на Бугарија.

Неприфатливо е што денес двајца блиски соседи и двајца сојузници во НАТО се толку антагонизирани, па дури и непријатни еден кон друг, и на ова мора итно да се работи.

Иако топката е во наш двор, двете влади мора да најдат начин да ја вратат довербата, да ја зајакнат соработката и да ја унапредат размената барем до нивото што го постигнаа нашите влади, а секако и повеќе.

Секоја иницијатива за реализација на Коридорот 8 треба да се поздрави и треба да се обнови политичката иницијатива I8 за политичка и безбедносна соработка меѓу земјите од Коридорот 8, пред сè трилатералната Албанија – Северна Македонија – Бугарија, под покровителство на Италија“, објави Османи, споделувајќи заедничка фотографија.

Со „Францускиот предлог“ спорот помеѓу Македонија и Бугарија се пресели од билатерално на ниво на ЕУ, но истовремено ги закочи евроинтеграциите на земјата со првиот услов што произлезе од истиот – да се признае бугарското малцинство во Уставот.