Благодарение на ковид-пандемијата, за неколку години може да имаме ВАКЦИНА ПРОТИВ РАК

Благодарение на притисокот што го создаде ковид-пандемијата за технологијата mRNA, за неколку години би можеле да имаме вакцина против рак.

Ковид неочекувано го забрза истражувањето на технологијата mRNA, која пред пандемијата беше изучувана и на полето на антиканцерогените третмани.

Во интервју за емисијата на БиБиСи „Недела со Лаура Куенсберг“, основачката двојка на BioNTech – компанијата која заедно со Pfizer ја создаде една од најшироко применуваните антиковид вакцини во светот – разговараше за иднината на технологијата mRNA и нејзината употреба во вакцина против рак:

„Како научници не сакаме да тврдиме дека имаме лек за ракот“, рече Озлем Туречи, но нејзиниот сопруг Угур Шахин беше оптимист:

„Можевме да имаме вакцина против рак пред 2030 година“, рече тој.

Технологијата на гласник РНК (mRNA) функционира со испраќање инструкции до клетките да создадат антиген: во случаите со Ковид, антигенот е протеинот на коронавирусот; кај ракот е маркер кој се наоѓа на канцерогените клетки. Имунолошкиот систем е обучен да ги препознава и насочува заболените клетки за да ги уништи.

„mRNA е лицето на бараниот човек на постерот на кој пишува „wanted““, објаснува Туречи: „во овој случај непријател се туморските антигени, кои овозможуваат да се разликуваат здравите клетки од канцерогените“.

Клиничките испитувања засега добро напредуваат, но од суштинско значење е да се биде претпазлив и да не се прогласи победа прерано:

„Постигнавме одреден напредок и ќе продолжиме да работиме на ова“, коментира Туречи.

Меѓу многуте потешкотии, постои и фактот дека клетките на ракот кои формираат тумори можат да бидат покриени со различни видови на антигени, а тоа го отежнува создавањето на вакцина која ќе може да ги елиминира сите клетки на ракот без да влијае на здравите.