Божиновска: Македонските енергетски приоритети ги претставуваме пред светските лидери

Министерката за енергетика, рударство и минерални суровини, Сања Божиновска, учествува на Лидерскиот самит во рамките на COP31 во Анталија, Турција, како дел од државната делегација предводена од претседателката Гордана Сиљановска-Давкова.

Според Божиновска, на самитот се собрале лидери и високи претставници од 191 земја, а разговорите се насочени кон климатските предизвици, енергетската транзиција и конкретните чекори за почиста и посигурна иднина.

Министерката го оцени учеството како можност Македонија да ги претстави своите енергетски приоритети, да размени искуства и да отвори простор за нови партнерства и инвестиции.

Меѓу приоритетите ги издвои зголемувањето на производството од обновливи извори, модернизацијата на енергетската инфраструктура и подобрувањето на енергетската ефикасност.

„Енергетската транзиција мора да биде одржлива, но и реална. Токму затоа е важно Македонија да биде присутна таму каде што се носат одлуките за енергетската иднина“, порача Божиновска.