На 12 години Македон доби признание за исклучителен талент од „Џонс Хопкинс“

Дванаесетгодишниот Македон од Македонија е примен во Програмата за талентирани млади при Универзитетот „Џонс Хопкинс“ во САД, една од познатите академски програми наменети за ученици со исклучителни способности.

По резултатите од тестирањето, Македон го добил и признанието „Гранд Хонорс“ во рамките на Центарот за талентирани млади, како признание за особено високи постигнувања во математиката и вербалните способности.

Тој е вклучен и во „Стади оф Експешнл Талент“ – програма на „Џонс Хопкинс“ наменета за ученици чии резултати на стандардизираните тестирања значително ги надминуваат очекуваните резултати за нивната возраст.

Неговите резултати се издвојуваат и по тоа што на само 11 години постигнал 1.440 поени на САТ тестот – 740 поени по математика и 700 поени во делот за читање и пишување.

Зад овие резултати стои и долгогодишен интерес за математиката. Македон досега освоил повеќе од 20 златни медали на меѓународни математички натпревари.

Неговото најново академско достигнување претставува уште еден чекор во развојот на млад талент кој, уште на рана возраст, покажува интерес и способности значително над својата генерациска група.

За неговото семејство, приемот во програмата на „Џонс Хопкинс“ е повод за особена гордост. За Македон, пак, ова е следна можност за учење и натамошно развивање на своите способности.