Овации и долготрајни аплаузи за романското дуо „Артисимо“ – уште една незаборавна ноќ на „П.С. Гитар Фест Крушево“ (фото)

Втората вечер од 17. издание на Меѓународниот фестивал на класична гитара „П.С. Гитар Фест Крушево“ донесе уште едно незаборавно музичко доживување, кое беше проследено со овации, долготрајни аплаузи и искрени воодушевувања од бројната публика во Спомен-куќата на Тоше Проески во Крушево.

Љубителите на класичната музика имаа ретка можност да уживаат во настапот на романското дуо „Артисимо“, ансамбл препознатлив по својата исклучителна музикалност, врвна интерпретативна зрелост и впечатлива сценска енергија. Со извонредна посветеност, виртуозност и беспрекорна изведба, уметниците приредија концерт кој долго ќе остане во сеќавањата на присутните, потврдувајќи зошто важат за едни од најценетите камерни состави од нивниот регион.

Во прекрасниот амбиент на Спомен-куќата на Тоше Проески, публиката беше сведок на вечер исполнета со емоции, префинети музички нијанси и врвни интерпретации кои создадоа вистинска магија на сцената. Секоја композиција беше наградена со силен аплауз, а на крајот од концертот следуваа стоечки овации како признание за извонредниот настап на гостите од Романија.

Уште еднаш беше потврдено и високото организациско ниво на фестивалот, кој веќе седумнаесет години успешно ја гради својата репутација како еден од најзначајните музички настани од ваков вид во земјата. Одличната организација, вниманието кон секој детал и исклучителната фестивалска атмосфера придонесоа и оваа вечер да помине во најдобар можен ред, на задоволство на учесниците и публиката.

Со тоа, фестивалот се приближува кон своето свечено заокружување. Завршниот настан ќе се одржи денес со почеток во 12 часот, кога ќе настапат учесниците од школата за гитара „Каровски“ од Кавадарци, под менторство на м-р Васко Пиличев.

Финалниот концерт ќе претставува вистинска прослава на младоста, талентот и иднината на гитарската уметност, а публиката ќе има ретка можност да ужива во посебни гитарски аранжмани и интерпретации на некои од најголемите хитови на Тоше Проески, изведени од младите учесници на фестивалот. На овој начин, преку звуците на гитарата ќе биде оддадена искрена почит кон музичкото наследство на нашиот незаборавен музички великан, со што на достоинствен и емотивен начин ќе биде спуштена завесата на уште едно успешно издание на „П.С. Гитар Фест Крушево“.