Горат социјалните мрежи во Македонија: Боки 13 во живо му се јави на Заев и му испрати гласовна порака (видео)

Бојан Јовановски – Боки 13 повторно се најде во фокусот на јавноста, откако во последните месеци бележи значителен раст на популарноста преку своите лајв-преноси и подкасти.

Заедно со Ритко, Боки 13 успева да привлече бројна публика со содржини кои често отвораат чувствителни и контроверзни теми, предизвикувајќи бурни реакции на социјалните мрежи. Токму во таква атмосфера, вечерва се случи потег што малкумина го очекуваа.

За време на директен лајв-пренос, Боки 13 јавно се обиде телефонски да стапи во контакт со поранешниот премиер на Република Северна Македонија, Зоран Заев. Повикот веднаш предизвика лавина реакции и коментари на социјалните мрежи.

Иако Заев не одговори на повикот, Јовановски потоа му испрати гласовна порака, во која се претстави како Бојан Јовановски – Боки 13 и нагласи дека му се обраќа во живо, пред бројна публика.

Во пораката, тој истакна дека ќе му се обрати со „Вие“, иако, како што рече, тоа не била негова лична желба, туку го сторил поради фактот што разговорот се одвива во директен пренос пред јавноста.

Јовановски воедно упати и јавна покана до Заев да гостува во неговиот подкаст, додавајќи дека доколку има храброст, ќе ја прифати поканата и ќе се појави во емисијата.

Односите меѓу Боки 13 и Зоран Заев денес се значително нарушени, иако во минатото беа блиски и често јавно демонстрираа пријателство.

Нивната релација се влоши по аферата „Рекет“, во која Јовановски беше осуден и помина извесен период во затвор, што остави длабока трага врз нивниот меѓусебен однос.

Вечерашниот телефонски повик и испратената гласовна порака повторно ја отворија оваа тема и предизвикаа силен интерес кај јавноста, со илјадници реакции и коментари во реално време.

Целото видео може да го проследите на овој линк.