Кавгите за шпицниот градоначалник чинат вкупно 16 илјади евра

Владејачката СДСМ потрошила 16 илјади евра за 25-те билборди кои ги нарача против лидерот на ВМРО-ДПМНЕ, Христијан Мицкоски во екот на јавната војна што се водеше меѓу градоначалничката на Град Скопје, Данела Арсовска и ВМРО-ДПМНЕ, партија којашто ја поддржа нејзината кандидатура.

Од СДСМ за „Фокус“ велат дека за плаќање на билбордите не користеле буџетски пари, кои им следуваат на партиите, туку ги платиле од други извори.

-За вистината којашто скопјани многу добро ја знаат, а СДСМ ја покажа на 25 билборди, партијата не користеше буџетски средства туку свои извори на финансирање, членарина и донации.

Согласно Законот, партиите се финансираат и од чланарина и од донации. Сумата за билбордите е во рамките на можностите на партијата, околу 16 илјади евра (помалку од 1.000.000 денари), велат од СДСМ за „Фокус“.

Билбордите кои осамнаа викендов низ Скопје се изнајмени за околу еден месец, поточно за период од 17 септември, кога беа поставени, до 14 октомври.Тоа значи дека партијата еден билборд го платила по 650 евра.

Тие се во сопственост на компанијата „Акцент медиа“ на Филип Спасовски. На нив имаше слика на Мицкоски и прашање „кај е шпицниот градоначалник“, а слики од билбордите беа објавени прво на социјалните мрежи.