Проданоски: Детските насмевки се најголемата победа на велосипедската трка

Над 200 деца учествуваа на „Ептен мини детската велосипедска трка“, која денеска се одржа на булеварот „Гоце Делчев“ во Прилеп. Најмладите велосипедисти возеа со поддршка од родителите и најблиските, проследени со аплаузи и охрабрување.

Градоначалникот Дејан Проданоски изрази задоволство од одѕивот и атмосферата, нагласувајќи дека ваквите манифестации се можност за дружење и создавање убави спомени.

„За нас, најголемата награда не се резултатите и победите, туку токму овие моменти, детските насмевки, дружењето и создавањето убави спомени“, истакна Проданоски.

Тој им се заблагодари на децата и нивните родители за учеството, на Здружението за култура и спорт „Нови маркови внуци“ – Прилеп и на сите што придонеле за успешната организација.

„Продолжуваме заедно да создаваме настани во кои децата се во центарот на вниманието, затоа што нивната радост е нашата најголема мотивација“, порача градоначалникот.