ВЛЕН: Со новиот буџет Скопје тргнува кон почист, модерен и уреден град

На вчерашната седница на Советот на Град Скопје беше усвоен ребалансот на буџетот за 2025 година, чекор што, според советниците од ВЛЕН, претставува клучна основа за поефикасно управување со јавните средства и подобрување на услугите за граѓаните.

Ребалансот овозможува посистематски пристап во распределбата на градските финансии, при што средствата ќе се насочуваат кон приоритетните области – квалитетни јавни услуги, современа инфраструктура и одржување на градот.

Советниците од ВЛЕН дадоа силна поддршка на процесот, истакнувајќи дека ваквиот пристап е неопходен за стабилизирање на финансиската состојба на Скопје.

Со усвоениот ребаланс се отвора простор за зајакнување на развојните програми за периодот 2025–2027, технолошка модернизација и дигитални услуги, зимско одржување на инфраструктурата, подобрување на јавната чистота и зеленилото, поддршка на јавните претпријатија, како и унапредување на социјалните, еколошките, културните и образовните политики.

Од ВЛЕН упатија благодарност до сите советници што дадоа поддршка, нагласувајќи дека ова претставува значаен чекор кон пофункционален, почист и поефикасен главен град.

Движењето останува посветено на одговорно и транспарентно работење со јасен фокус на потребите на граѓаните.