Израел ја враќа смртната казна за затворениците?!

Израелскиот Кнесет треба следната недела да гласа за закон кој би овозможил извршување смртна казна врз палестинските затвореници.

Овој потег следи по притисокот на министерот за национална безбедност, Итaмар Бен-Гвир, член на крајно десничарската партија, кој се заканува дека ќе ја повлече поддршката за коалицијата ако законот не биде усвоен.

Најавата беше објавена в понеделник вечер во соопштение од Офир Кац, претседател на коалицијата во владата на премиерот Бенјамин Нетанјаху. Според соопштението, „по средбата меѓу претседателот на Комитетот за национална безбедност Цвика Фогел, претседателот на коалицијата Офир Кац и правниот советник на Кнесет Сагит Афик, е договорено следната недела да се одржи повторна расправа за законот за смртни казни за терористи (кој се однесува на палестинските затвореници и притвореници), по што ќе следи гласање на крајот на седницата.“

Кац истакна дека „коалицијата цврсто стои зад одобрувањето на законот што е можно поскоро“.

Бен-Гвир коментирајќи ја најавата рече: „Честитки до претседателот на коалицијата, пратеникот Офир Кац, за изјавата дека гласањето за законот за смртни казни ќе се одржи следната недела по повторната расправа. Исто така, честитки до членовите на Комитетот за национална безбедност, кој го води пратеникот Цвика Фогел од партијата Оцма Јехудит, за нивните неуморни напори да го унапредат овој закон во комитетот.“