Коњановски: Со мешани патроли до побезбедна младина

Градоначалникот на Битола, Тони Коњановски, синоќа беше дел од мешаната патрола составена од претставници на СВР Битола, Општинскиот совет за превенција од малолетничко престапништво, ЈУ МЦСР Битола и родители на малолетници.

Патролата од 21 часот до 1 часот по полноќ ги посети локациите на Широк Сокак и Градскиот парк, како омилени места за собирање и дружење на младите. Целта беше да се подигне свеста за одговорно однесување во вечерните часови и да се укаже на опасностите од консумирање алкохол и психотропни супстанции.

„Со вклучување на родителите во мешаните патроли се испраќа јасна порака за поголема превентивна активност и заедничка грижа за младите“, нагласија организаторите.

Членовите на патролата разговараа и со сопствениците на угостителски објекти, барајќи доследно почитување на законските одредби од Кривичниот законик и Законот за јавен ред и мир, со цел намалување на девијантните појави, ноќното дивеење и уништувањето на јавните добра.