Македонските универзитети повторно ги нема на Шангајската листа за 2025 година

Харвард е рангиран како најдобар универзитет во светот, пред Станфорд, МИТ, Кембриџ и Беркли, објави Шангајската листа за 2025 година. Македонија, сепак, и оваа година нема ниту еден универзитет меѓу најдобрите 1000 институции во светот според шестте истражувачки индикатори.

Овој резултат алармира за потребата од сериозни реформи, зголемена финансиска поддршка и поттик за подобрување на квалитетот на наставата и истражувањата во македонското високо образование, за да се избегне трајна маргинализација на земјата во светската наука и образование.

Социологот Илија Ацески за телевизија 24 посочува дека квалитетот на високото образование подолг период опаѓа и нагласува дека треба да се отстрани клиентилистичкиот однос кон студентите. Тој препорачува воведување на проценка и контрола на дипломирани студенти за да се гарантира дека дипломите се заслужени.

Методологијата на Шангајската листа ги рангира универзитетите според бројот на Нобеловци и добитници на Филдсов медал, објавите во престижните списанија Nature и Science, високо цитирани истражувачи, индексирани научни трудови и вкупните перформанси по глава на жител.