Бурим Љатифи ја обвини ДУИ за 20 години промашувања и манипулации со Охридскиот договор

Директорот на државната компанија МЕПСО, Бурим Љатифи, јавно упати остри критики на сметка на дваесетгодишното владеење на Демократската унија за интеграција (ДУИ), обвинувајќи ја партијата за серија неуспеси и занемарување на клучни прашања важни за Албанците во Македонија.

Во објава на социјалните мрежи, Љатифи посочува дека Охридскиот рамковен договор не е целосно имплементиран, и покрај тврдењата на ДУИ. Според него, реалноста покажува поинаква слика:

„Албанскиот јазик без вистинско законско решение.

Правичната застапеност со дефекти во имплементација.

Децентрализацијата и зајакнувањето на општините заборавени.

Медресето со лажно решен статус.

Пописот криминализиран.

Универзитетите без автономија, под партиска контрола.

Политички процеси, судења и пресуди за Албанци.

Висок коруптивен степен и богатење на високи функционери“, напиша Љатифи.

На крајот од својата реакција, тој со иронија го критикува ДУИ за постојаното фалење дека Охридскиот договор е реализиран, додека, како што вели, состојбата на терен е сосема поинаква.

„Срамота“, завршува Љатифи, изразувајќи револт кон политиката која, според него, две децении го злоупотребувала довербата на граѓаните.