Меџити: Еколошката безбедност е прашање на здравје, економија и иднина

Првиот вицепремиер и министер за животна средина и просторно планирање, Изет Меџити, денеска ја отвори првата национална конференција „Заедно за одржлива животна средина“, испраќајќи силна порака за обединет пристап и итна акција во справувањето со еколошките предизвици.

– Живееме во време кога еколошките кризи повеќе не се апстрактни закани, туку секојдневна реалност со директно влијание врз јавното здравје, безбедноста на храната, економијата и социјалната благосостојба – истакна Меџити во воведното обраќање.

Тој нагласи дека зголеменото загадување во урбаните средини, загубата на биодиверзитетот, климатската несигурност и притисокот врз природните ресурси бараат долгорочна визија и решенија базирани на докази.

Како што посочи првиот вицепремиер, целта на конференцијата е да се поттикне дијалог и координација меѓу сите релевантни чинители – јавните институции, меѓународните партнери, академската заедница, индустријата, невладиниот сектор и самите граѓани.

– Целта е јасна – да изградиме интегриран и одржлив пристап кон животната средина, со кој таа ќе се третира како основа на националниот развој. Работиме на создавање на ефикасен механизам за еколошко управување кој ќе овозможи мерење на напредокот, идентификување на слабостите и реформулирање на политиките за управување со природните ресурси – изјави Меџити.

Во рамки на конференцијата се одржуваат две панел-дискусии: првата за заштита и управување со природни ресурси, а втората за одржливо управување со отпадот и премин кон циркуларна економија.

Меџити најави дека оваа конференција ќе прерасне во годишна традиција, која секоја година на 5 јуни – Светскиот ден на животната средина – ќе ги обединува сите засегнати страни околу заедничката визија за зелена иднина.

На крајот, првиот вицепремиер ја прогласи за официјално започната и националната кампања „Одржлива иднина“, со која ќе се промовираат активности за еколошка свест и одговорност низ целата земја.