„Со колку украдени пари се добива златна виза за Дубаи?“ – Твитерџии и јавноста со жестоки реакции по признанието на Филипче

По признанието на поранешниот министер за здравство и актуелен лидер на СДСМ, Венко Филипче, дека поседува „златна виза“ за Дубаи, социјалната мрежа Твитер е преплавена со иронични, критички и саркастични коментари. Прашањето што најмногу одекна е: „Со колку украдени пари се добива златна виза за Дубаи?“

Коментарите на твитер-заедницата беа насочени кон тоа дека златна виза не се добива за работа, туку за значителна инвестиција – односно вложување од најмалку 550.000 американски долари (околу 2 милиони дирхами), најчесто преку купување имот или други инвестиции во Обединетите Арапски Емирати.

„За работа би добил работна виза, златна е нешто друго“, напиша еден корисник на Твитер. Други пак прашуваат со иронија дали парите за визата доаѓаат од „мекици и родендени“, алудирајќи на честите оправдувања на политичарите за потеклото на средствата.

Филипче го призна поседувањето на визата во подкаст, што е спротивно на неговите претходни изјави во кои ги негираше ваквите информации.

„Филипче и Заев – златни визи, срам за државата“

Од ВМРО-ДПМНЕ, преку Валентин Манасиевски, беа упатени нови обвинувања. Тој директно го праша Филипче дали има удел во бизнисите на Зоран Заев во Дубаи и зошто три месеци не одговара јавно на тоа прашање.

„Молкот на Филипче е громогласен“, изјави Манасиевски. „Од каде му на Филипче над половина милион долари за ваква виза? Дали е тоа дел од инвестиција во 50-катница во Дубаи?“

Опозицијата дополнително го обвини Филипче дека со политичкиот врв на СДСМ ја довел државата до економски колапс, а сега ужива во бенефити кои, според нив, укажуваат на сомнително стекнат капитал.

СДСМ: „Нема инвестиции, нема имот“

Од СДСМ, пак, стигна реакција во која се негираат било какви инвестиции или сопственост на имот во Дубаи од страна на Филипче. Сепак, партијата не понуди дополнителни детали за основата врз која е добиена визата – информација што се коси со официјалните услови за златна виза во ОАЕ.

Според достапните информации, ваква виза се доделува на лица кои имаат значајни инвестиции, вклучувајќи недвижнини, сопственички удели во бизниси или научно/технолошко влијание во земјата.

Димитриевски од ЗНАМ: „Со златна виза не се станува лидер на народ“

И градоначалникот на Куманово и лидер на ЗНАМ, Максим Димитриевски, се огласи со коментар. Тој оцени дека СДСМ е целосно отуѓена од реалноста и дека Филипче не може да се претставува како автентичен лидер додека поседува „златни визи“, додека народот се бори за основна егзистенција.

„СДСМ функционира само преку ПР-трикови и фабрикувани скандали“, рече Димитриевски.

Дали златната виза на Филипче ќе остане симбол на нова политичка криза или ќе биде основа за институционална истрага – останува да се види. Но едно е сигурно: молкот повеќе не е опција.