Омерагиќ и Ќумбев: Заеднички чекор кон подобар македонски фудбал

Денес, на 14 февруари 2025 година, беше остварена средба помеѓу претседателот на Фудбалската федерација на Македонија (ФФМ), Масар Омерагиќ, и претседателот на Синдикатот на фудбалери на Македонија (СФМ), Панче Ќумбев. Средбата означува важен чекор кон обновување на соработката помеѓу двете организации, која во изминатиот период беше значително намалена.

Како резултат на оваа средба, повторно се отвори прашањето за решавање на спорните ситуации во македонскиот фудбал, особено во однос на неактивноста на Арбитражниот суд при ФФМ. Од страна на претседателот Омерагиќ беше потврдено дека во наредниот период ќе започне процес на организирање и активирање на арбитражата, кој ќе биде поддржан не само од ФФМ и СФМ, туку и од меѓународните фудбалски институции, како што се ФИФПРО и УЕФА.

Покрај ова, на средбата се разговараше и за нови проекти кои ќе придонесат кон подобрување на условите за фудбалерите во Македонија, како и за јакнење на односите меѓу федерацијата и синдикатот. Двете страни изразија подготвеност за заедничка работа со цел создавање подобри услови за македонскиот фудбал.

Обновената комуникација и подготвеноста за соработка меѓу ФФМ и СФМ се позитивен сигнал за иднината на македонскиот фудбал, со надеж дека преземените чекори ќе резултираат со конкретни подобрувања во спортот.