Коњановски: Година на работа и резултати – 180 проекти за развој на Битола

Вкупно 180 проекти во различни фази, над 10 километри обновена и новоизградена патна инфраструктура и вложувања во училишта, градинки и спортски објекти го одбележале изминатиот едногодишен период во Битола. Ова го истакна градоначалникот Тони Коњановски на денешната 17-та седница на Советот на Општина Битола, презентирајќи отчет за првата година од вториот мандат.

Во обраќањето во пресрет на 4 Ноември – Денот на ослободувањето на Битола, Коњановски нагласи дека одбележувањето на празникот го поврзува со конкретни вложувања и долгорочно планирање на развојот на градот.

Според податоците што ги изнесе, 34 проценти од проектите се завршени, 27 проценти се реализираат, за 17 проценти се потпишани договори, а за преостанатите 22 проценти подготвителните постапки се во завршна фаза.

„За општина со 85.164 жители и 65 села, секогаш има многу што да се направи, но бројката од 180 проекти кои ја одбележуваат изминатата една година потврдува дека оваа локална самоуправа, професионално и посветено, дејствува во вистинска насока“, рече Коњановски.

Нови улици, паркинзи и комунална инфраструктура

Во инфраструктурниот дел, градоначалникот издвои над 10 километри обновени и новоизградени патишта и улици во урбаните и руралните средини, како и инвестиции во повеќе од три километри водоводна и канализациска мрежа.

Меѓу посочените проекти се булеварскиот влез од страната на Прилеп, улицата „СТУ 3“ со 100 паркинг-места, паркингот на „Браќа Џаферови“ за 25 возила и паркинг-просторот на „СТУ 9“ во АРМ четврт 3 со над 70 места.

Коњановски се осврна и на реконструкцијата на „Маркс и Енгелс“, асфалтирањето повеќе градски улици и зафатите во Братиндол, Трн, Ротино, Барешани, Карамани, Раштани и Буково. За уредувањето на плоштадот „Гоце Делчев“, како што посочи, решението се бара преку граѓански форум.

Вложувања во спортот и образованието

Отчетот опфати изградба и реконструкција на 24 училишни спортски терени и четири типски спортски сали, дел завршени, а дел во реализација. Боксерската сала е во завршна фаза, додека во Бистрица се работи на трансформација на досега нефункционален објект во мултифункционален простор.

За спортската инфраструктура Коњановски наведе износ од 310.412.172 денари.

Во образованието ги издвои топлинските пумпи и енергетски ефикасната фасада на ОУ „Стив Наумов“, работите на новата училишна зграда во Буковски Ливади, реконструкцијата на училиштето во Крклино и вложувањата во ОУ „Елпида Караманди“, ОУ „Ѓорѓи Сугарев“ и СОУ „Таки Даскало“.

Над 470 места во новите градинки

Коњановски посочи дека проектите за новите детски градинки опфаќаат над 470 места за згрижување деца. Градинката „Пчеличка“ е отворена, завршена е новата градинка кај ОУ „Климент Охридски“, а продолжуваат работите на градинката во АРМ.

Според неговата најава, со градинката во АРМ следната година листата на чекање треба да се намали за 246 деца.

Противпожарна зграда, инвестиции и туризам

За новата противпожарна зграда Општина Битола вложила над 52 милиони денари до фаза карабина со поставена дограма. За втората фаза, која предвидува внатрешно опремување, Коњановски наведе грант од Министерството за одбрана на САД во вредност од еден милион долари.

Во економскиот дел ги посочи отворањето на фабриката „Брејнчајлд производство“ и поставувањето камен-темелник на вториот маркет „Лидл“. За развојот на туризмот ја издвои изработката на физибилити-студија за гондола на Пелистер, со цел планината перспективно да се развива како четирисезонски туристички центар.

Според градоначалникот, културните настани во последните десет месеци привлекле над 100.000 посетители, а преку општинската Програма за култура се обезбедуваат околу 45 милиони денари.

Коњановски им се заблагодари на советниците, администрацијата и граѓаните за соработката, нагласувајќи дека предлозите на битолчани се дел и од подготовката на буџетот за 2027 година.

„Предизвици има уште многу, а нивното решавање е можно само со посветена работа, конструктивна соработка и љубов кон градот кој мора да напредува во секоја област“, порача Коњановски.