Голема воена вежба во Србија: претставени ново оружје и беспилотни системи

За време на големата воена вежба „Победник 2026“, Србија ја претстави својата „дигитална армија“, вклучувајќи вооружени роботски кучиња, нови дронови и борбени платформи без екипаж. Во вежбата учествуваа над 2.000 војници и 500 борбени системи, демонстрирајќи ја насоката во која Белград ги модернизира своите вооружени сили.

Примарната цел беше да се подобри интероперабилноста и тактичката координација меѓу различните воени родови – од копнените единици и военото воздухопловство до специјалните сили. Вежбата исто така послужи за прикажување на воените капацитети и за тестирање на новото и модернизирано вооружување на Вооружените сили на Србија. Концептуално, таа симулираше премин од одбранбени дејства кон офанзивна операција во услови на хибридно војување.

Вежбата се одвиваше во повеќе фази, од август до почетокот на октомври, на клучни воени полигони за обука. Првата фаза се фокусираше на масовни удари и координација на воздухопловните капацитети со оклопните и механизираните единици. Тактичките вежби со помали единици и гаѓањето со боева муниција се одвиваа на полигонот Меѓа, додека на полигоните Орешац и Пескови се вежбаа противсаботажни операции и неутрализирање на терористички групи.

Дигитална армија и роботски кучиња
Најголемо внимание привлече интеграцијата на платформите без екипаж во борбениот поредок. Беше демонстриран концепт на „роботизиран прв контакт“, дизајниран да ја намали изложеноста на војниците за време на почетните фази од нападот. Истакнато место зазедоа таканаречените „роботи-кучиња“ – копнени платформи од кинеско производство наменети за извидување, транспорт на товар и непосредна поддршка.

Според оперативниот концепт, овие роботи со четири нозе се дизајнирани да влегуваат во утврдени и потенцијално минирани објекти, пренесува српскиот портал Tango Six. Тие можат да носат митралез од 7,62 мм, револверски фрлач на гранати од 40 мм или противоклопна ракета М-80 „Зоља“. Носивоста на роботите од приближно 50 килограми им овозможува да го компензираат трзајот на автоматското оружје.

По робот-кучињата, во борбените дејства беа вклучени тимови за специјални операции, падобранци и единици на воената полиција со оклопни возила „Милош“ и „Хамер“. Беа демонстрирани и платформите без екипаж од типот „Мали Милош“, вооружени со митралези и фрлачи на гранати, додека воздушна поддршка обезбедуваа дроновите „Осица“ и „Комарац“, како и беспилотниот бомбардер од семејството дронови „ИКА“. За извидување на теренот и корекција на артилерискиот оган беа користени беспилотните летала од домашно производство „Врабац“ и „Сенка“.

Вежбата ја следеше и српскиот претседател Александар Вучиќ. Тој ја оцени како „многу добра“ и истакна дека вооружените сили минуваат низ технолошка трансформација. „Не може без војници и човечкиот фактор. Но, нашата цел е луѓето што помалку да се изложуваат на опасност“, рече Вучиќ.