Адеми: Дали постои владеење на правото во Македонија? Отстранувањето на албанскиот јазик од таблите е кршење на законот

Покрај потпретседателот на ДУИ, Бујар Османи и генсекот на партијата, Арбер Адеми, реагираше на, како што велат, отстранувањето на албанскиот јазик од таблите за добредојде во Македонија на граничните премини, поставувајќи прашања за функционирањето на владеењето на правото и спроведувањето на Законот за употреба на јазиците.

Адеми нагласува дека прашањето не е само политичко, туку е директно поврзано со владеењето на правото, прашувајќи дали законите важат подеднакво за сите или се спроведуваат според интересите на владата.

Според него, Законот за употреба на јазиците е посебен закон (lex specialis) и има приоритет пред другите закони за прашањата што ги регулира. Тој се повикува на Член 16,Сстав 2, нагласувајќи дека на граничните премини и аеродромите во општините каде што најмалку 20 проценти од граѓаните зборуваат јазик различен од македонскиот, таблите и знаците мора да бидат и на тој јазик.

Понатаму, Адеми го споменува и Член 23, Став 5, според кој, во случај на несогласување со други закони, државните органи се должни да ги спроведуваат одредбите од Законот за употреба на јазиците.

Тој прашува како е можно знаците и таблите на албански јазик да се поставуваат со години на граничните премини, а сега се отстранети, иако законот не е изменет.