Макфест 2025 – 40 години музичка традиција во Штип

Ова издание ќе биде вистински празник на македонската музика, со три вечери исполнети со емоции, носталгија и нови звуци. Првата вечер е посветена на дебитантите, каде ќе настапат 13 нови изведувачи кои ќе се претстават со оригинални композиции. Втората вечер ќе донесе 14 афирмирани музичари и автори со свои нови песни, додека третата вечер ќе биде ретроспектива на најголемите хитови од минатите децении на Макфест, изведени во ново, современо аранжманско руво.

За јубилејот, фестивалот ќе биде придружен од жив оркестар од 20 музичари, што ќе ја збогати атмосферата и ќе го врати препознатливиот шарм на старите фестивалски изведби. Наместо класичен натпревар со победници, оваа година ќе се избира „најслушаната песна“, што го става акцентот на публиката и нејзиниот вкус.

Со четири децении постоење, Макфест останува симбол на македонската поп и забавна сцена, место каде што своите први чекори ги направија многу познати пејачи и композитори. Јубилејното издание ќе биде можност за нови таленти да се истакнат, а за публиката – да ужива во златните хитови што ја одбележаа историјата на фестивалот.

Фестивалот ветува незаборавни вечери исполнети со музика, емоции и гордост за македонската песна.