Скандал: Единствениот Албанец во комисијата за „8 Септември“ сам на себе си ја доделил државната награда

Новинарски сознанија до кои дојде нашата редакција откриваат сериозен скандал во Комисијата за доделување на Државната награда „8 Септември“, која денеска ќе ги врачи највисоките спортски признанија во Кристалната сала на Собранието на Република Македонија.

Според достапните информации, Хамид Бакија, единствениот Албанец во комисијата составена од вкупно 12 члена, е меѓу годинашните добитници – при што, според истите извори, токму тој лично го предложил и поддржал своето име за добивање на наградата. Ова, практично, значи дека член на комисија сам си доделил државно признание, што претставува директен судир на интереси и сериозно го доведува во прашање кредибилитетот на целата процедура.

Наградата „8 Септември“ претставува највисоко признание за животно дело и достигнувања во областа на спортот и е симбол на државна почит, меритократија и спортска праведност. Затоа, ваквиот потег наидува на жестоки реакции во јавноста, особено од претставници на албанската заедница, кои го нарекуваат ова „најнов доказ за системска нееднаквост и исклучување на Албанците од процесите на одлучување“.

Парадоксот е уште поголем ако се земе предвид дека во комисијата има 11 Македонци и само еден Албанец, и наместо токму тој да предложи некој од бројните заслужни албански спортисти, тој одлучил да ја додели наградата на самиот себе.

Од партијата ДУИ велат дека случајот ќе биде пријавен до Државната комисија за спречување на корупцијата, бидејќи се работи за флагрантен пример на судир на интереси. Дополнително, од таму потсетуваат дека ова не е прв ваков случај – минатата година, брат на градоначалник од редовите на ВМРО-ДПМНЕ, кој исто така бил дел од комисијата, си доделил награда, и покрај тоа што јавноста остро реагираше, немаше никаква институционална разврска.

„Охридскиот договор не смее да остане само формалност. Еднаквоста, правдата и достоинството на секој граѓанин мора да се одразат и во спортот. Ова не е апел, ова е повик за правда“, велат од ДУИ, кои најавуваат институционално дејствување.

Комисијата за доделување на наградата „8 Септември“ е формирана со потпис на претседателот на Собранието, Африм Гаши. Засега, нема официјален став од институциите ниту појаснување за процедурата со која членовите на комисијата можат да добијат награди додека се активни во неа.

Настанот за доделување на наградите ќе се одржи попладнево, но наместо свечена атмосфера, истиот ќе биде проследен со сериозни сомнежи и критики во врска со транспарентноста и легитимноста на одлуките.